Jokatani (Salvation) by Rev. Aldrine D. Marak Pastor SBC

JOKATANI

Rev. Aldrine D. Marak

Pastor SBC

Ming 2 kattani miksongani: JOKA aro JOKATA

JOKA inode an·tangari jokako miksonga.

JOKATA inode sakgipinni dakchakachisa jokatako mana.

BAPTIST MANUAL-O JOKATANI GIMIN JANAPANIRANG: B/M No.17 (p. 6) Maiba toromni kamrangko dakanichi an·ching an·tangtangko jokatna man·ja. Indiba Jisuko

bebe ra·anichisa jokataniko man·a.

B/M No. 19 (p.19) Jokataniko man·nara papi an·tangan gisik pil·na paponi an·pilna nanga aro Jisu Kristoko bebe ra·na nanga.

B/M No. 25 (p.11) "Saved to Serve" dangdike on·na jokataniko ma·na. Jokataniko man·a dangdike on·a ong·ja.

JANGGI JOKANI GIMIN BEBERA-ANIRANG:

1. Janggi jokaniko da·ode u·ina man·jawa, ambino bichalni salosa u·ina man·gen.

2. Jisuko ra·chake janggi jokaniko man·oba pap ka·taiode jokatanikon gimaatpila.

3. Jisuko beberare janggi jokaniko man·a, aro ia jokgimin janggi maming dakeba gimapiljaha.

Sastroni gita chong-motgipa skiani aro Baptistrangni bebe ra-aniara gittamgipa bakan ong-a.

Git mingsao indake janapa, "Sagalni chiara kali ong·oba, salgiara sechakani ong·oba Isolni an·tangni dakgimin mandena aro a·gilsakna ka·sae jokatani kamni gimin bon·e sena aro talattokna man·jawa" Jokataniara ian Isolni kam ong·a. Uko mande ba maiba Isolni dakgiminrangoni an·tangari dakna man·ja. Mande an·tangari pilakkon dakna man·ode jokataniko ba jokatgipakon nangjawachim.

Jokatanio rokom gni donga:

Skanggipao chu·sokgipa ba chu·onggipa janggi tangani obostakon jokatani ine agana. Je biapan ba obostaan mamingnaba kangal ong·ani dongja maming neng·nikanirang aro simbrana nanganirang dongja, mamingnaba kenna nanganirang dongja, saknaanirang sinjetanirang dongja. Jeo kusini tom·tomanirang silroroanirangan gapaia aro je biap ba obostaon Isol Jihovako Dakgipa Rugipa pilaknin Nokgipa Gitel ine ra·chakani donga uan jokatani onga.

Gnigipao maiba namgijagipa ba ong·sigipa biap ba obostaoniko naljokatanikon jokatani ine agana. Sastroo mongsongbate miksonge agangipara ia gnigipakon miksonga ine nikna man·gen. Isol salgi aro a·gilsakko "nambejok" ine dakahaoba (A-ba. 1:31), mande saitanni ruraa aro ja·gao ga·ake pap ka·aintal ua da·o an·tangba aro gipin Isolni dakgiminrangba ong·sibegipa obostao ong·aha (A-ba. 2:15-17:3:1-24;Rom.5:12).

Maioniko jokata:

>>>>Isolni ka·o nangaoni jokani

>>>>Noroko galonako man·aoni jokani

>>>>Paponi jokani

IA MING 3 NI GIMIN CHANCHIRIME NIATNA:

PAP>>>>>>>>MANDE>>>>>>>JOKATANI

PAP NI GIMIN TALATANI:

Papara English Dictionaryo talatani gitade, niam pe·ani aro pilak toromni, cholon bewal aro toromni niamrangko pe·aniko miksonga. Papara namatna man·gijagipa janggini sabisi ong·a.

1. Papara niamko pe·ani ine agana (Git. 51:1; Daniel 9:5: I Johan 3:4)

2. Isolni donsoaona sokgijani (Missing the mark) Isolni rasongko man·sokgijani (Daniel 9:5; 1 Johan 5:17; Rom. 3:23)

3. Namgijana miksongani (Toe Skianirang 24:9)

4. Nama ine u·ieba uko dakgijani (Jakob 4:17)

5. Isol baksa bobil ong-ani (Isaia 59:2)

PAP MAIKAI MANDEO NAPCHENGAHA:

Pap maikai mandeo napchengaha, uko an·ching A·bachenga Odhai 3-0 nikgen. A·bachenga 2:9-0 janggiko on·gipa bol aro nama namgijako u·iani bolni gimin janapaniko nika. A·bachenga 2:17 janapgimin bolni biteko cha·na beng·aniko nikskaaha, aro ia beng·aniara mamungba ong·gijaniko dakani ong·ja. Ian Isolni nambee ong·atgiminrangna tik dake dongiminsan ong·aia. Isolni ong·atgiminrang Isolna bamna, manina aro kenna nanga. A·bachenga odhai 3-o papni ganghoani ba namgijaniko nikgen. Papara namen namgijagipana bame on·ani ba uchi amako man·anisan ong·ja, indiba beng·aniko manigija chudoaona sokna jotton ka·aniba ong·a. Chong·motan ian mande badia arini ning·o ong·na nangachim, unoni ong·katani aro Isolni kosako bobil dakani onga. Beng·gimin bolni biteko nike dakmajoaniko man·anio:

1. Isolni kosako tol·e on aniko knatimaha.

2. Isolni ka-saaniko aro Uni kattao ka·dongchakjaha

3. Isolni beng·gipa bitechiko niataha. mikbokaha.

4. Isolni beng·gipa bitena

5. Isol gita ong·na sikaha.

6. Isolni beng·ako uni biap ong·gijagipaona sokna jotton ka·on ua uni niksokgijagipa onbatsranggipa biapona ga·akonaha. Ua Isol gita ong·na jotton kaon ua an·tangni nagandeaniko nikskaaha. Chong·motan mande Isol gita ong·na jotton ka·on an·tangna mamungba ong·ja, indiba mamungnaba choligijagipa nagandegipasa ong·aia ine nikskaaha.

ISOLNI MANDENA GE ETANIKO ON ANI:

Isol mandeko dosgri ong·atachim, indiba "nama namgijako u·iani bolni biteko cha·na nangja; maina uni biteko cha·ani salon na·a sichongmotgen" (A-ba. 2:17,9) ine maina Isol mandena ge·etaniko on·aha? Mandeara maina ua ge·etaniko manina nanggipa ong·a? la sing·anina indake aganchakna man·gen.

1. Ge·etaniko gisik ra·e manion, Isolni dakgipa ba nokgipaong·aniko rakianiko mesoka. Isol an·tangni dakgiminni kosako pilakkon dakna bil man·gipa ong·a; mandede Una bame janggi tangna nanggipasa ong·aia.

2. Ge·etaniko gisik ra·e manion, Isolko gisik ra·jringe janggi tanganiko mesoka (A-ba. 3:2-5).

3. Ge·etaniko gisik ra·e manion, Isol baksa bakrime janggi tanganiko mesoka. Isol an·tangan mande baksa bakrime janggi tangna sikgipa ong·a ine sastroo mesoka (A-ba.3:8,9,21); ia sikanion Isol mandeko an·tangni jagringo ong·ataba ong·ataha (A-ba. 1:26-28) Isolni ge·etaniko mandena on·aniara Isol aro mandeni bakrimaniko bilakata. Ia ge·etaniko on·engon, Isol mandena base dakna on·aha. Adam aro Hoba Isolni ge·etaniko gisik ra·e uko manie dongode uamang Isolni Gisik ni jagringo Isol baksa janggi tangbanganiko man·kamgenchim, indiba Isolni ge·etaniko manijaode Isoloni chel·ataniko man·e pangnajolna sina nangskagen (A ba. 2:17).

MANDE:

Isol mandeko ong·aton miksonga gnangsa ong·ataha.

Mandeko Isol an·tangni jagringo ong·ataha (A-bachenga 1:26-27). Jagring kattani miksonganiara mikronchi nikgipa bimangni jagring ba salakim ong·ja, ian gisikni jagringsa ong·a. Isolo be·en bimang dongja, indiba ua Gisik ong·a (Johan 4:24), "an·tangni jagring gita" ine Isolni agangipara Isol an·tangni Gisikni jagring gita ba Isol an·tangni Gisik jedake ong·a ua gitan inesa ong·a, maina Isol mandeko tiktak ong·esa ong·ata jedake ong·siani gri name ong·ata. Isolni Gisikara rongtalgipa,bebegipa,tanggipa, ka·saan gapgipa etc. ong·a. Man·gope aganon Isol an·tangni Gisik gita mandeko ong·ataha.

Minggipin: Isol mandeko an·tangna on·titisan onbate ong·ataha (Git. 8:5). Ian Isolni mandeko mairongpile

gamchate ong·ataniko mesoka.

ISOLNI MANDEKO ONG-ATANI MIKSONGANI:

1. Skanggipa: An·tang baksa bakrimma ong·ataha (A-ba. 1:26: 3:8-9). Uni mandena ge·etaniko an·tang baksa bakrimna ong·a (2:15-17).

2. Gnigipa: A·ako aro pilak janggi gnanggiparangko nirok simsakchina ong·ataha (A·ba.1:26,28,

2:15)

3. Gittamgipa: Me·a aro me·chik jik se dongrime dedrangko ba·e a·gilsako jelbra jelsuchina ong·ataha (A-ba.1:28)

JOKATANIARA MAIA: Jokataniara maiba namgijagipa obostaoniko naljokatanikon 'Jokatani' ine agana. Uandake, Sastro-o jokatani miksonganiara minggni dake dong·a. Skanggipara: Nokol itaoniko be·ennigita Isolni jokatani. Mesokna; Israel Jatrangko Egypt a·songo nokol itaoniko Mose-ko watate jokataha uako Niam Gitcham- ni bako nikna man·gen, Reongkata 3:7-12; 13:17-22. Gnigipara: Mande-ko papni sao aro marang nang·aoniko Isolni jokatani (Mati 1:21) chongmotan jringirotni janggiko (eternal life) on·ani (Johan 5:24). Iano Jringirot ingipa

kattani miksonganiara baikam·gipa (everlasting), chu·ongnikgipa (satisfying), chu·sokgipa(wholeness) aro su·akpilgipa (abundant) ong·a.

JOKATANIKOARA MAINA NANGA: Isol salgi aro a·gilsakko 'nambejok' ine dakahaoba (Aba. 1:31), Isolni dakchenggipa mande, Adam aro Hoba satanni ruran aro ja gao ga·ake pap ka·aintal an·tangna, dedrang su·drangna aro pilak Isolni dakgiminrangnaba ong·sibegipa obostako ba dongkamgipa papni sao aro marangko (original sin) ong·ataha aro uandaken siani pilakonan sokaha (Aba. 2:15-17: 3:1-24, Rom 3:9-10, 19, 23; Rom. 5:12, Gal 3:10 aro Ephe 2:3). Unbaksana ia papni sao aro marangara, Mandeni janggi tanganio dongkame Isoloniko chelrikrikatanga aro uandaken u·ie ba u·ijacba satanni ska-namnikani gita, papni kamrangkosa dakaiaha aro dakengku·a (actual sin). Maina indake agana Mandeni ma·siani andalaha (Eph 4:18. 1 Kor 2:14), Mandeni ka·tong namgija ongaha (Jer 17:9-10), Mandeni gisik(spirit) aro ui·ani(mental) ong·siaha (Aba 6:5, Titus 1:15), Mandeni be·en ong·siaha (physical ). Mandeni sikani bilgriaha aro Isol gita on·gani mandeo dongjaha(good moral) (Rom 3: 23: 7:18). la indakgipa papni sao aro marang nang·aoniko jokatna ba rongtalatna gita mande an·tangari mamung cholko dakeba manjaha, maina an·chingara papi(Rom 3:23; 8:3) aro matburingrangni an·chiba paprangko ra·angna gita bilgria (Ibri. 10:4). Uni gimin. papna nokol aro sinjetaoniko naljokatna ba jakgitelatna Isol an·tangni Depante Kristo Jisu jean ong·sia gripa an·chio(I Pit.1:19; 2:22; Ibri. 7:26; 9:14; Wat. 4:27-29; I John 3:5) jokatna kamko ka·na nangaha( Rom. 8:2-3) maina ong·sia gripasa susrangna amachim(Ibri. 9:14) aro an·chi onggijade pap wata ong·jachim(Ibri.9:22). Ua a·selni giminsa, mande sakantian papni sao aro marangoniko naljokataniko aro susranganiko nang·aha. Unbaksana, jedakode mande sakanti nama kamrangko ka·na man·gen (Eph 2:10, Titus 3:8), bite nangna am·gen (Rom. 7:4), ka·sagrikna man·gen (1 Johan 4:7-21, sakki on·na man-gen (Wat. 1:8), aro gisikchi janggi man·gen(Rom 8:4).

JOKATANIKO MAIKAI MAN·GEN: Mandede maming cholchiba an·tangaride jokna manteljahani gimin (Git. 3:8) Isol an·tangni Depante Kristo Jisu-o jokataniko ona kam ka·aha ine an·ching kosako janapgipa kattarangoniko u·ibaaha. Indiba jokatanide an·tangaride nangna re·bajawa ba jokatjawa aro unbaksana mitam manderang angade mamung namgija kamkoba ka·kuja, uni gimin gisik pil·na nangjawa ine chanchia; indiba iako u·ina gita nanggen an·chingni papi ong·aniara papni kamko ka·ani gimin ong·ja, bakabaonin pap gnang (Rom 3:10, 23; 5:12; Eph. 2: 3; Rom.5:12).

MANDENI DAKNA NANGANI: Skanggipao, an·tangni ong·enga obostako (original sin) u·ie, an·tangni gimin ku·rachakna ba ra·chakna nanga (Rom 5:12) aro mande an·tangko papni saoni ning·o ong·enga aro papni sastirangko ra·na nang·enga ine u·ina nanga (Rom. 6:23). Uni gimin paponi jokataniko nang·enga ine u·ina gita nanggen aro Mande sakantian Isolo kema bi·na gita nanggen (Mark 1:15, Johan 3:5; 1 Johan 1:9).

Gnigipao: Mande an·tangaride paponi jokna amjaha ine u·ie Isolni jokna chol on·enggipako ra·chakna nang·a aro ua cholara Jisu Kristo-on ong·a(1 Johan 5:11. Wat. 16:31). Uni Chisolo sichakaniko beberar·e (Ibri. 11:6, Johan 3:16, 36) an·tangni Jokatgipa aro Gitel ine Kristoko ra·chakna nang·a (Rom 10:9-10). Jokataniara Isolni indin on·enggipa ong·a ine u·ian baksa bebera·na nanga (Ephesus 2:8,9). Uandake onggenchim ong·ode Jokataniko man·a ama (Gal.3:26-27).

MAIKAI BEBERA·A CHANCHIE NINA:

Sastroo bebera·e jokataniko man·ani gimin seaniko nika. Ia bebera·a ingipani gimin mingantikode niangjawa indiba anga ba na·a saksa bebera·gipa ong·e Isolni kata gita ong ama ong·ja uko kan·dike nianganisan ongaigen.

(1) Maio bebera·a (Ibrirangna 11:6, Rom. 10:17).

(2) Sako bebera·a (Watatarang 16:31. Rom. 10:9).

(3) Maina bebera·a (Rom 3:23, 6:23. Parape a 20:14)

JOKATANI GIMIN SRANGE MA·SIGIJANI BA JAJAANI A·SELRANG:

v Isolni kattao ka·dongna man·ja: Jokatanikoara sastroon name manchaan sea donga indiba saoba sastroni gita ong·gija skina a·bachengaha ukosa dal·bate ra·aha. Sastroni gita ong·gija aganritingbaaniko ong·nikbate nika. John Calvin "Jokataniko tale masinade an·ching Isolni kattaoni a·bachengna gita nanggen" ine agana. Bang·a manderangni jokataniko bebera·na amgijani a·sel uan Isolni kattao bebera·na amja.

v A·gilsaknirangchi sinchepaniko man·anichi: la a·gilsako janggi tangengon bang·a nangnikanirang donga aro mandeo chu·ongnikgijanirang donga. Indake a·gilsakna ka·pakanichi aro suk rasongko sandianichi chong·motgipa bebera·aniona re·bana man·ja.

v Re·ongkata 32:32.33 "Aro da·o na·a uamangni papko watnakode aro watjaode, anga mol·mola, nang·ni segimin ki·taponiko angko kimitbo" Bang·a skigiparang ia sastroni kattao pangchake jajaanirangko man·a. Janggini ki·tap ine chanchie Jokataniko gimaatpila ine jajaa. Indiba ia ki·tapara Israel jatni jakgitel ong·e re·bamitingo sakantini bimungko see rakigipasa ong·a.

v Jokatani gimin skianiko knaaha indiba Altar call onade re·bajaha uni gimin mai ong·gensai îne jajaa sokbaa

v Jokatani gimin sastro-o pangchake skianio u·isretani gimin aro Kristoni chisolo matchote sichakani miksonganiko u·ijani gimin (Ibri. 6:4-6; 10:26-31 indiba iano Jehudi Christian jerangan Kristo Jisu-ko jegale Judaism torom-ona re·angpilgiparangnasa aro re·anggnigiparangnasa mikrakaniko on·e se·aha. Aro ua Ibri. ki·tapni podrango mangmang pangchake jokatani-ni gimin chu·soke skina man·jawa gipin ki·tapni podrangko nisusana nanggen, jedake Jhn 3:16; wata. 16:31; Eph. 2:8-10; 1 Pit. 1:18-19; ssl Jhn 5:13; Eph. 1:13-14; Rom 11:29; Titus 1:2; Jhn 10:28-29; Rom. 8: 38-39).

v Nama kamrang-o pangchakani gimin Isaia 64:6; Rom 3: 20, 24, 26; Gala. 2:16-21,; Eph. 2:8).

v Jisu Kristoko jokatgipa ine bebera·aha indiba ra·chakani salko see rakina gualaha unan mai ong·gensai jajaani dongenga. Maibakai indakgipa obostao ong·genchimoba jajaani dongna nangja maina bebera·chongmotahaode jokatanikode man·aha sal tarikko see donna gualoba salgiode see donaha (Salgiode record ka·aha) ine bebera·na.

BEBERA·ACHI JOKATANIKO MAN·AHA INE U·IANI BA JOKAHA INE KA·DONGANI:

v Jokataniko changsa na·a Jisu Kristoko ra·chakahaon jokatanikode man·manaha (1 Johan 5:11-13, II Kor. 6:2, Johan 1:12). Indiba bang·a manderang 'Joka man·aniko an·ching maikai da·o u·ina man·gen? U·ina man·ja simanosa u·igen' indine bebera·a. Siani ja·mano mandeko jokatna ua an·tang aro gipinrang darangba mamungkoba dakna man·jawaha Isolni bichalsan uko sengsoaignok (Ibrirangna 9:27). Siani ja·mano an·tangko aro gipinrangko jokatanina mamungkoba dakna man·jaha ine mesoka (Luk 16:19-31 Lazarus aro man-e cha-gipani)

v Sastroo Isolni an·tangni Depante Jisu Kristoko bebera·giparangna on·gipa jokataniko "Jringjrotni janggi" (eternal life) ineba talataniko on·a (Johan 3:36). Jringirotni janggi ine aganon uko janggi silchi ine chanchia indiba uan ong·ja. Mande ong·ode sakantian janggi silchi donga. Indiba jringjrotni janggikode Kristo Jisuo bebera·giparangsan man·na amaia. Jringjrot ingipa kattara "bakroaniko" ba "ru·rutaniko" miksongja. Indiba "baikamgipa" "chu·ongnikgipa" "Chu·sokgipa" (wholeness),"suakpilgipa" (abundant) ong·anikosa miksonga. Ia jringjrotni janggi uan bon·changgijagipa, gimagijagipa, baikamgipa ong·a. Jisuko bebera·e anga ba na·a jringirotni janggiko man·ode maikaisa gimapilgen. Gimapilgipa janggide jringirotni janggi ong-na amjawa. lan Isolni sakki ong·a 1 Johan 5:9-11 "An·ching manderangni sakkiko ra·ode, Isolni sakki dal·bata; maina Isolni sakki ian; ua an·tang Depanteni gimin sakki on·aha. Isolni depanteko bebera·gipa an·tango sakki man·a. Isolko behera·gijagipa uko tol·gipa dakaha; maina Isol an·tangni depanteni gimin on·gimin sakkiko ua bebera·jaha; aro ua sakki ian Isol an·chingna jringjrotni janggiko on·aha aro ua janggi uni Depanteo gnang. Depanteko man·gipa janggiko man·aha, aro Isolni Depanteko man·gijagipa janggiko man·ja"

v Jokataniko tale ma·sina an·chingni pangchakani uan sastroo, Isolni kattaosa ong·a. An·chingni Isol bebegipa, ku·rachakatangko rakigipa aro ka·dongna man·gipa ong·a. Titus 1:1, 2 "Paul, Isolni nokol, aro Jisu Kristoni watata Isolni segiminrangni bebera·a, aro toromni gimin bebeko u·ianini gimin, jringjrotni janggina ka·dongao, jeko tol·naamgijagipa Isol, jringirotni salna skang ku·rachakaha"

v Jisuko bebera·e man·gimin jringirotni janggiara gimapiltaijaha (Johan 10: 27-29, Johan 5:24. Johan 6:47, Ephesus, 2:8-9).

v Gisik Rongtalgipa sakki on·a (Romrangna 8:16. Gal 4:6).

v Jokgimin janggirangna aganchakgnigipa uan Jisu/Gisik Rongtalgipa( I Johan 2:1, Rom 8:34, Timothy 2:5) donga.

v Jisu Kristoko bebera·e jokatako man·giminrangni bimungko janggini ki·tapo(Parape·a 20:15, Lk. 10:20) inc janapgimin sastroo nikna man·a.

Jokatani (Salvation) by Rev. Aldrine D. Marak Pastor SBC

Post a Comment

Contact Form