DOCTRINE OF SIN by Miss. T. Ch. Momin

2/23/2023

0

DOCTRINE OF SIN

I. Talatchengani:

Skanggipa Tanggipa Gitel Jisuko ia somoina mitelna namnika, jean angko ia somoio pap-ni gimin talataniko dakna gita sesoaha. Gnigipao anga na·simangkoba mitelan baksa angni nambegipa salamko on·chenga sakantinan "Salam"

Salantion an·ching dakgrik dinggrika, cha·ua, ra·seka, togia, so·ota, tileka, mandeskako palsruke cha·a ingipa kattarangko koboroniko knasona aro niksona man·enga. Iaranga maini a·sel onga niatode papni a·sel ong·enga ine ui·atna man·a. Maina papan mandeko namgija kamrangko ka·atenga aro mandea papni nokkol ong·esa namgija kamrangko ka·na draatako man·enga. Uni gimin an·ching da·alo papara maia? Banoni ong·baa? Aro maikai mandena effect ong·a ba papni a·sel mandena mai ong·achim? Uarangni gimin ia paper-o pangchake nianganiko dakgen.

II. Papara maia?

Wayne Grudem Systematic Theology-o indake papko talata "Sin is any failure to conform to the moral law of God in act, attitude, or nature." Isolni janggi tangna on·gimin namgipa kam cholon bewal, chanchiani ba daka rikaniko dakna man·gijanian pap ong·a Papara Mandeni kamsan ong·aija indiba an·chingni chanchianiba ong·a (attitude) be·enchi chu·sokatjaoba gisiko chanchian Isolni nikaniode pap ong·a (Reo.20:17: Mat. 5:22,28; Gal. 5:20). Basic Bible Doctrine·o indake agana "Sin is a hopelessly incurable disease of the soul". Namatna ka·donggijagipa janggini sabisi gita papara ong·a ine pe·na man·gen. Sastro maikai papko talata uko niatskana "papko ka·gipa sakantian niamkoba pe·a aro niamko pe·an pap ong·a" (1 Jn.3:4), Dongimin niamko pe·ahaode uan pap ka·a ong·a aro pap ka·ahaon niamkoba pe·a ong·aha. Minggipin namako dakna ui·e uko dakjahaoba pap ong·a ine Jakob 4:17-0 agantaia.

List of sins:

Ø (Reo.20:3-17; 1Kor 6:9-10: Rom. 1:29-31; 1Tim. 1:9-11; Kol.3:5-8: Gal.5:19-21: Mk.7:20-23).

III. Papni ong·baani (Origin of sin):

Papni ong·baaniko an·ching ka·mao sulsul niangna.

a) Saitanni Pap karchengani: Saitan jekon Lucifer ine minga uasa papko dakchnegaha ine sastro janapa (Isa. 14:12-14; Eze. 28:11-19). Uko gisik seng·gipa, nitogipa, teng·gipa sa·gre ( 2Kor.11:13-15 ) ineba janapa, uasa Isol gita apsan ong·na ske Uni singhasono ong·na jotton ka·aha indake ua Isolni bobil ong·baaha. Lucifer Isolni singhasono ong·e Isol gita apsan ong·na skaha indiba uara Isolni ong·atako man·gipa sagresan ong·paiani gimin batna ba apsan ong·naba man·ja.

b) Mandeo Papni napani (Sin entered into Human Race): A·bachengako poraiode an·ching Adamko Isolni Eden barioniko pangsa bolni biteko cha·jachina beng·aniko nika (Ab.2:15-17). Indiba uamangni Eden bagano romitingon chipuni bimango saitan re·bae dakmajoaha Saitan chachipilgipa, seng·ani sagre dake dakjegipa ong·a (2Kor. 11:3,14). Indake tol·ako Hoba ra·chake bolni biteko ake cha·aha aro papo ga·akaha (Ab.3). Ua somoi dipatsa mandeo pap chagaaha aro papi ine chanako man·baaha (Rom 5:12)

c) Papni Bite (Sin and its Effect): Jensalo Adam aro Hoba pap ka·aha rang·sanan uamang gisikni gita siako man·aha Isolni gisik baksa ong·jaha ekatako man·aha (Eph 2:1), uamangni mikron oaha nagandeaniko ui·e kratcha·aha. Isolna kene dongnuaha mikkang pa·na pa·jaha. Dostangko ra·chakna man·jaha. Isolni saoko man·na nangaha me·chik de ba·ani somoio sakna sitengtona nangan baksa me·asani ning·o ong·aha (Ab.3:14-16). Me·asa janggi tanga gimik dingol kramchi ong·e game cha·na nangaha aro a·aba saoko man·paaha (Ab.3:17-18). Isolni uamangna agana gitan uamang sina gita nangaha (Ab.3:19). Maina papni dormaha sia ine Paulba agana (Rom.6:23). Papni a·sel Mandeni be·en (physically), gisik (spirit/mental), cholon bewal (moral) pilakan nosto ong·ako man·aha (Eph.4:17-18, 1Kor.2:14, Jer. 17:9, Titus 1:15) Diabolni dedrang ong·banha (Jn.8:44), papni nokol ong·aha (Jn.8-34; Rom.6:6,14). Pap ka·kugijagiparangni kosakoba sia pamong ong·aha (Rom. 5:14). Pap ka·gipa diaboloni ong·a (1 Jn.3:8). Unbaksa mande papni a·sel bebe ra·gijachi bichal ka·ako man·a (n 3:18), jringirotni sastiona re·angna nanggen chong·motan norokona (Git 9:17: Mat 25:41, 46; Para.20:14), Norokara diabol aro uni sagrerangna sastiko on·na tarisogimin biap ong·a (Mat.25:41), uan namen sakna sitengtona nanggipa biap ong·a ine Jisuni man·e cha·gipa aro Lazarusni gimin toe agananio nika (Luk. 16:23). Norokara wa·alni wari ong·a jean kamchongijagipa ong·a aro uno jo·ongrang sijachim (Para. 14:10-11; 20:15: Mat.13:41.42.50: Mk.9:44.48).

d) Batrikrikgipa Pap (Inheritance of Sin): Adam aro Hobani pap ka·anira umangon bon·aijaha indiba dedrang sudrangona batrikrikba·aha jekon inheritance ba original sin ine English-o agana (Rom 5:12: Rom 5:19). Adam aro Hobani dedrang su·drang sakantian papo atchibagipa ong·ani gimin pilakan papi ong·a, te·gatchuni bitchrioni te·gatchu atchia gitan papini dedrangde papian ong·baaha (Git.51:5). Uni giminsa a·gilsako darangba pap gri dongja mande gimikan atchitonin papi ong·a toromi dongja ine sastro-o agana (Rom.3:10.23: 5:12; Eph.2-3).

e) An·tangoni Ong·gipa Pap (Actual Sin): Mande jensalo dal·baa chanchina changbaa unon an·tangari jakgitele basee jekoba dakna (freewill) man·a. Indiba mandera namgija kamkon basee dakna gita a·bachenga ukon actual sin ine English-o agana. Ian Adamoni ong·bagipa ong·ja an·tangoni ong·bagipa ba dakgipa ong·a. An·ching chonaonin nama namja pilakon ma·a paaoniko aro dal·batgiparangoniko skie ra·an baksa Kristian-ni dedrangde Isolni kattaonikoba niamrangko ui·a jedake Ge·eta Mingchikung (Reo.20:3-17), Iano an·ching jakdangdikjachina ge·etaniko nika indiba Jisuni Niam Gitalo a·brio skianiko nika jakchi dakujaoba gisiko chanchianian pap ong·aha ine nikbaaha (Mat. 5:21-44). Papni gisepo dal·bata chonbata dongja minggipinko manie mingsao gaakahaode uan apsan ong·aia (Jak 2:10-11): uni giminsa pilakan Isolni mikkango papi ong·a ine aganaha (Git 14:3, 143:12; 1Kng8:46. TS.20:9), Saoba ango pap dongja ine chanchiode uan an·tangko brangatgipa ba tol·gipasan ong·aia ine sastro-o agananiko nikgen (1Jh.1:8).

IV. Bon·atani:

Papara banoni maikai mandeona sokba·aha an·ching niataha aro papni a·selan mande sakantian sina gita nangaha. Mandeara atchiaonin Adam Hobaoni batrikrikgipa papko man·e papi ong·e atchiaha aro an·tangni skako chu·sokatgips papan mande sakantio donga ine ui·aha. Ua papni a·selan mandeara jringirotna noroko sastiko man·na nangenga. Indiba noroko mandeni sasti man·e sitengtoaniko Isol nikna sikjae Ua mandena jokani cholko on·aha. Ua cholra Uni Depanteo bebe ra·anian ong·a. Uni gimin na·simangna maikai paponi jakgitelna aro noroko ong·gnioni jokna man·gen uani gimin jamano skie on·anggen: Isolni Gisik na·simangko dilchina aro jokako sakantian man·china angni ska aro bi·a.

Miss. T. Ch. Momin

Pastor of

Gime Songgital Baptist Church

Tags: A·chik/Garo Bible Verses

DOCTRINE OF SIN by Miss. T. Ch. Momin

Post a Comment

Contact Form