Assurance of Salvation (JOKATANI GIMIN SRANGE MA·SIANI)
Mr. P. Ch.Marak.Asst.Pastor
Talatchengani :- Mane jat pilakan Isolni jagringosa ong.atgimin ong.ani gimin Isol an.tangni jagringo ong.atgimin mande sakantinan ka.saa. Ua saksani gimaanikoba nikna sikja; aro sakantini gisik pil.aniko nangnika. 2 Pit.3:9;1, Tim. 2:4. Uni gimin lsol an.tangni ong.atgimin manderangko man.pilna Depante Jisu Kristoko watataha; aro Mandeni pilak sastiko Uni (Jisu Kristoni) kosako gataha. Isaia. 53:4-6.
Indake Isol mandena jokaniko on.engon , chu.soke aro matchoten dakaha ; aro uara Jisu Kristo gita ong.a. Joh. 10: 10;1 Thess. 5 :23 -24.
Da.o lsol Jokataniko Chu.soken on.ahaoba Mandeni dakna nanggni donga. Uarangara:-
1. Paptangko uiani :- An.tangko Papi ine uina nanga. 1 Joh. 1:8,10; Rom.3:23
2. Paptangko ku.rachakani:- An.tangko Papi ine uiahaon paptangko lsolna ku.rachakna nanga. 1Joh.1:9; Toe Skia. 28:13.
3. Bebera.na nanga :- "Jisu Kristoan Isolni Depante , Uan angni papni gimin Chisolo siaha; aro Uan sigiminoni chakatatako man.aha" ine ka.tongo bebera.na nanga Rom.10:9-10.
4. Kristo Jisuko ka.tongo ra.chakna nanga :- Jisu Kristosa Gitel aro Jokatgipa; aro Jringjrotni Janggi ong.ani gimin, Uko an.tangni "Gitel" ong.china ka.tongona okamna nanga. John 1:12; 1John 5:12; Para 3:20; Mati 10:32. Aro ian an.tangni ka.tongko Isolni Torom Nokdring ong.china on.ani ong.a. 1 Kor.3:16-17.
5. Paponi an.pilani :- An.tangko papi ong.a ine uiahaon, unoni ba namgijaoni an.pilani dongna nanga. Aro jerangan lsolni namnikgijani ong.a uarangko watgale janggi tangna nanga. Toe Skiani 28:13; John 8:11; Rom 6:1-4, 15-18.
"Jokataniara" Jisu Kristoo lsolni indin on.anisa ong.a. Eph 1:6-7; Rom 3:24; Eph 2:5-6,8-9. Isolni Kristo Jisuo on.gimin jokataniko man.a, mande Kristo Jisuko bebera.nasan nanga. Rom 10:9-10; John 3:16,36
Jisu Kristoko bebera.aha ong.ode, Jokataniko man.aha. John 5:24; John 6:47; 1 John 5:12. (Jokgimin ong.aha ba jringjrotni janggiko man.aha.) 1 John 5:13; 2Kor 6:2
A.chik ring.ani Git No. 297-ni pod 4 oba an.ching ring.a, Rimdobo jokgimin ang' janggiko
A.R. No. 302-ni pod-1 oba ring.a,
Nama uiani, Jisu angnin, Salgin' rasongko man.soa ian, Joka man.aha, Isol brejok, An.chichi tale , Gisikchijok.
Una agreba, Git No. 256-ni pod 5, Git No. 348-ni Chorus aro Git No. 109-ni pod 3, iarangko nibo. Uandake Jisu Kristoo bebera.ahaon jokgimin ong.aha, ine an.ching olakkiani gitrangoba ring.a.
JISU KRISTOKO BEBERA.E RA.CHAKAHAON ISOLNI JOKATAKO MAN.AHA, INE SASTROO TALATANIRANG.
ISOLNI DE ONG.AHA, - John 1: 12; 1John 3 :1-2; Gal 3:26; 4:6-7.
GITAL DAKAKO MAN.AHA, - 2 Kor 5: 17; Titus 3:5; KoL 3 : 10
ISOLNI KEMA KA.AKO MAN.HA, - 1 John 1: 9; Kol 1:13-14; lsaia. 1:18
GISIK RONGTALGIPACHI MOHOR SU.AKO MAN.AHA, - Eph 1:13-14; 4:30; John 14:16-18,23; Rom 8:9; 2Kor 1:22.
TOROMI CHANAKO MAN.AHA, - Rom 8: 30, 33-34; 4:23-24.
JAKGITEL ONG.ATAHA, - Jakgitel ong.ataniara, dosi donge dosini gimin sastiko man.a nangahaoba, uni dosiko changija uko sastioniko jakgitel ong.atani ong.a 2Kor 3:17, Rom 8:1-2; 6:17-18; John 8:34-36.
RONGTALATAKO MAN.AHA, - 1John 1:7; lbri.13:12; 10:10. la Rongtalataniara, Paponiko Isolna dingtangatani ong.a. lan Changsa Rongtalatenba bebera.gipako jringjrotna jokatani ong.a. lbri 10: 14; lbri 9:12.
PAP PINDAPAKO MAN.AHA, - Rom 3:25; 4:7; Git 32:1-2; A.R.No. 293
NANGRIMATAKO MAN.AHA, - Kol 1 : 19-22; 2Kor 5 : 18-19
ATCHITAIAHA, -1 Pit 1:4-5; John 3:3; 1Pit 1:23.
GITAL BIMANGKO GANAHA, - Eph 4:23-24; Kol. 3:9-10.
SEAHA, - Joh 15 :16; 1Pit 2:4, 9-10.
SALGINI SONGNOKO NAPAHA, - Eph 2:6; Phil 3 : 20.
BEBERA.A ARO KAMNI NANGRIMANI (BEBERA.A BAKSA KAM)
Gitel Jisu Kristoko bebera.ahaon, Jokataniko ba jringjrotni janggiko man.aha. Jokataniko man.aniara ja.pang ba ja.dil ong.a. (Baptist Manual I No.25.) Nama kamara ja.pang ba ja.diloni nae bite nanggipa ong.a. Luk. 6 :43-45. Jokataniko man.aniara nama. ja.dil ong.a, nama ja. diloni bipang ong-gipa bite nangon nama biteko nanggen. Unigimin na.a Jisu Kristo bebera.aha ong.ode nang.ni janggi tanganio nama kamrangko nikgen. Bebera.gipao nama kam ja.rikgen. Jisu Kristo an.chingko jokatahani gimin aro an.chingni papko watahani gimin an.chinga Isolna, Kristo Jisuna, Kristian ripengskarangna aro Kristoko aro lsolko uigijagipa manderangnaba gro nanggiparang gita ong.baaha. (Baptist M. No. 137) Beben an.ching ia groko chotna amjagenchimoba a.gilsako janggi tangengkua dipet tikele Isolni kamko ka.pagiparang ong.na nanga. Maina lsolni jokatanian nama kamrangko ka.chinan an.chingko jokataha. Eph 2:10; Phil 4:9; Kol 2:6-7
Uni giminsa Jakop 2:17 , 26 -o, "Kam gri bebera.a sia" ine agana. lani miksongani, Jisu Kristoko bebera.a ong.ode, bebera.gipao nama kamrangko nikgen, indiba bebera.a ine aganoba nama kamrang dongjaode bebera.kugijagipaan ong.a ba nang.ni 'bebera.a" ine agangipa kakket ong.ja ine miksongani ong.a. Bitechin bolantiko uia, ine agana. Luk 6 :43-44; Mati. 7: 17, 18.
Minggipin, 1 John 3: 9 -o indake agana, Isoloni atchigipa pilakba pap ka.ja, maina uni bitchri uno dongkama; aro ua pap ka.na amja, maina ua Isoloni atchiaha. Aro 1 John 3 :6.
"Isoloni atchigipa pap ka.ja" ine aganengon, intentionally (Miksongmanchae) pap ka.gijaniko aro papo dongkamgijaniko miksonga. Maina Mande Papko ka.on,basakoba Intentionally (Miksongmanchae) papko ka.a aro basakobara Accidentally (Maibaka.e) papo ga.aka. (1 John 2:3-6; John 14:23,24.)
Mande sakantion Papni a.sel bilgriani donga. (Sins of Weaknesses) John 1:8, 10. There are diferent between Sin of Weaknesses and Wilful habitual Sin. 1 John 3 :9.(Papni a.sel bilgriani aro siksongmanchae papo janggintangani)
Uni gimin papni a.sel bilgrianio basakoba maibakae papo ga.aknaba donga, indiba bebera.gipa ong.ode ba atchitaigimin ong.ode mamung saloba papo dongkamjawa.
Minggipin, An.ching bebera.gipa sakantini ka.dongna man.aniara, An.ching maibakai (Accidentally) papo ga.akode Jisu Kristo an.chingna aganchakgipa ong.a. 1Joh.2 :1.
Jisu Kristoan an.chingni nambata jamin (Advocate) ong.a. Ibri 7:22; Rom 8:31-35; 1Tim. 2:5,
BEBERA.GIPANI GUNRANG.
1. KATCHAANI :- 1 Pit 1:9, Bebera.gipao Gisik Rongtalgipani bil kam ka.a. Gal. 5:22-23; Rom. 14:17; 1 Thess. 1:6.
2. KA.SACHAKANI:- Rom. 5:5. la Kristo Jisuni maironggipa ka.saani bilan bebera.gipako Pagipa lsolna, Gitel Jisuna, aro bebera.giparangna (mandeskanaba) ka.sana draata. Mark. 12:29-31; Mati.22 :37-40; Joh.13 : 34; 14 :21-24.
3. MITELPIL.ANI :- 2 Kor, 9: 15- Isolni Depante Jisu Kristoko on.ahanina Isolko mitelna skani; aroba Gitel Jisuni jokatanina mitelna skani gisik donga. 1 Thess.5:18; Ibri.13:15-16
4. ISOLKO OLAKKINA SKANI DONGA :- Git. 34: 1; John 4 : 23-24.
5. MANINA SKANI :- Bebera.gipa jensalo Jisu Kristoko an.tangni Gitel aro jokatgipa dakaha, ua somoionin uni nokol ong.baskaaha aro una bame uni ge.etanirangko ba uni ska aro namnikanirangko dakna on.kanggimin ong.aha. Uni gimin bebera.gipao manina skani donga, maina bebera.gipako manina sikatgipara Kristoni ka.saani bilan ong.a. 2Kor 5:14; Joh 5:3-4; 1Joh 2:3-5
6. ISOLNi KATTAKO PORAINA SKANi/KNATIMNA SKAni DONGA :- Git.1: 2; Git. 119 : 105, 11.
Thank You
Do you Wish to donate
